«المغرب واعر». جوج ديال اللاعبين كان عندهم مشكل ديال الفيزا والباسبور وتحل في 3 ديال الساعات.
بعدما تخلف المهدي النملي، لاعب المغرب التطواني، وعبد اللطيف نوصير، لاعب المغرب الفاسي، عن رحلة المنتخب، أمس الأربعاء (2 يناير)، في اتجاه فرنسا، بسبب انتهاء صلاحية الباسبور ديال الأول وعدم حصول الثاني على التأشيرة، أكد مصدر مطلع أن تدخلات نافذة على مستوى عال في الدولة حلت المشكل البارح في العشية، وبسرعة البرق النملي حصل على باسبور جديد والفيزا ديال فرنسا، وحتى نوصير خدا الفيزا اللي تعطلات بسبب تأخر المناداة عليه من طرف مدرب المنتخب الوطني.
وكانت بعثة المنتخب الوطني لكرة القدم، قد غادرت يوم أمس، المغرب متجهة إلى فرنسا للالتحاق بالمحترفين المغاربة في أوروبا، ومن تمة التوجه إلى جنوب إفريقيا للمشاركة في نهائيات كأس إفريقيا للأمم.
وشهد مطار محمد الخامس في الدار البيضاء احتفالات تشجيعية للمنتخب، وجابو ليهم الدقة المراكشية، وتصورو معاهم الناس في المطار، وكان الطاوسي راشقة ليه، واخا عارف آش تابعو في جنوب إفريقيا.
المهم طريق السلامة وما ترجعوش بكري عفاكم.
دوزيم لايف
